O XII PROAM Abanca, punto de encontro entre club, empresas e afección / Obradoiro

Noticia

O XII PROAM Abanca, punto de encontro entre club, empresas e afección

18 de marzo de 2026

O Multiusos Fontes do Sar acolleu este martes 17 de marzo unha nova edición do tradicional torneo que reúne a empresas colaboradoras, persoal do club e membros do primeiro equipo nunha xornada de deporte e convivencia.

O Monbus Obradoiro celebrou este pasado martes 17 de marzo o XII PROAM Abanca no Multiusos Fontes do Sar, consolidando unha cita xa clásica dentro do calendario social da entidade. O evento volveu reunir a empresas colaboradoras, traballadores do club, xogadores e corpo técnico do primeiro equipo, así como xornalistas e representantes de peñas obradoiristas.

O torneo estruturouse nunha fase de grupos seguida de semifinais e final. Un dos equipos destacados, o de prensa e peñas —vixente campión e aspirante a revalidar o título— non logrou acadar a final tras caer en semifinais. Finalmente, o equipo de staff do Obradoiro proclamouse campión, resarcíndose tras ser finalista na edición anterior. O conxunto de Abanca completou o podio como subcampión.

Entre as empresas participantes atopábanse Abanca, Estrella Galicia, FEGABA, Cabreiroa, Asorey, Ojo al Vatio, Galmotor, Ambulancias Nordés, Limpiezas Salgado, USC, Cega, Ozono, BYD Resnova Motor, Balidea, Carrefour, Chichalovers, Vayper, Artio, Lambonadas, Sicilia in Bocca e Deltacargo, reflectindo o forte tecido de apoio que rodea ao club durante toda a tempada.

Como é habitual, cada equipo contou coa participación dun ou dous xogadores ou membros do corpo técnico do primeiro equipo, que exerceron como xogadores ou adestradores, achegando un compoñente profesional á competición amateur.

A xornada concluíu coa entrega de premios ao xogador revelación, ao peor xogador —en clave distendida— e ao equipo campión. Posteriormente, todos os participantes gozaron dun petisco no palco de Sar, grazas á colaboración de Sicilia in Bocca, Lambonadas, Estrella Galicia, Coca-Cola, Cofiño e Os 3 Cucharons, poñendo o broche final a unha xornada marcada polo compañeirismo e o bo ambiente.