Os encontros ante o MoraBanc Andorra en setembro e o Real Madrid, o Ilerna Lleida, o Recoletas Salud San Pablo Burgos e La Laguna Tenerife en outubro deixaron tres candidatos, propostos pola prensa local de Santiago, para facerse co galardón.

Finalmente, foron os afeccionados os que, a través das redes sociais, elixiron a Alex Barcello como mellor xogador do mes, cun 52,8 % dos votos. Na segunda posición quedou Joel Soriano, cun 38,2 %, seguido de Leo Meindl, cun 9 %.

Durante o acto de entrega, o xogador amosou a súa satisfacción e agradeceu á afección o recoñecemento, aínda que quixo poñer o foco no traballo colectivo. "O único que importa agora é traballar xuntos para volver gañar. É necesario traballar cada día, porque a tempada é moi longa e o baloncesto sempre é un esforzo colectivo".

Sobre a súa estrea na ACB, recoñeceu que é "unha liga moi dura, con moito talento e grandes xogadores, pero intentamos dar o mellor de nós cada día para chegar ben aos partidos". Ademais, destacou a súa capacidade para achegar en diferentes facetas do xogo: "Enerxía, defensa, asistencias, puntos. O que faga falta para axudar o equipo".

Esta fin de semana, o Monbus Obradoiro medirase ao Barcelona nun esixente encontro no que os composteláns buscarán dar a sorpresa. "Contra o Real Madrid competimos ben e levámolos á prórroga. Necesitamos facer algo semellante, sendo competitivos durante todo o partido. O Barcelona é un bo equipo, con moito talento, pero afrontamos ese partido coa intención de gañar, como sempre".

UN TROFEO CON MOITA HISTORIA

Desde hai moitos anos, Estrella Galicia entrega o premio ao MVP de cada tempada do Monbus Obradoiro, coa participación da afección na elección. O novo trofeo da tempada 26/27 é moito máis ca un recoñecemento: representa a historia e a maneira de entender as cousas da compañía.

Está elaborado a partir de palés que durante anos transportaron cervexa Estrella Galicia desde a fábrica ata os puntos de consumo. Materiais que, unha vez cumprida a súa función, se recuperan para darlles unha nova vida. Así, o círculo péchase.

O que un día levou a cervexa ata os consumidores, hoxe volve a eles convertido nun recoñecemento ao xogador que eles mesmos escolleron.

Da fábrica ao consumidor. Do consumidor ao MVP. E do MVP, de novo, á historia de Estrella Galicia.