Leo Meindl: “Estou aquí para facer o que sexa necesario para conseguir as vitorias” / Obradoiro

Fichaxe

Leo Meindl: “Estou aquí para facer o que sexa necesario para conseguir as vitorias”

18 de setembro de 2026

O novo xogador do Monbus Obradoiro móstrase ilusionado cos seus primeiros días en Santiago, destaca a boa acollida do equipo e asegura que chega disposto a achegar en todas as facetas do xogo.

Leo Meindl xa está integrado na dinámica do Monbus Obradoiro. O brasileiro, que chegou a Santiago hai aproximadamente unha semana tras a súa participación coa selección nacional, recoñece que a súa adaptación foi “máis rápida do que imaxinaba”.

“Gústame moito a dinámica do equipo, os xogadores e o corpo técnico”, explicou durante a súa presentación oficial, celebrada en éclinik. O aleiro tamén destacou a variedade de perfís do cadro: “Hai xogadores físicos, técnicos, con máis experiencia e outros que non. Creo que esa mestura é importante”.

En canto ao seu papel, Meindl asegura estar preparado para achegar en calquera faceta: “Se é rebote, estarei aí. Se é defensa, se son puntos, se son consellos… Estou para facer que o equipo sexa un pouco máis sólido en todos os sentidos”.

O brasileiro tamén agarda con ganas a súa estrea no Sar: “Son un tío emocional e gústame moito estar preto da afección”. Tras as súas experiencias en España e Xapón, Meindl afronta esta nova etapa con ambición e ten claro que quere mirar cara arriba: “Se poñemos a atención nos detalles, podemos facer algo grande”.

éclinik, novo colaborador do Monbus Obradoiro

éclinik incorpórase esta tempada á familia de colaboradores do Monbus Obradoiro, compartindo co club valores como o deporte, a saúde, o esforzo e a profesionalidade.

Categorías

Plantilla

Equipo