Abanca recibe ao Monbus Obradoiro tras o seu regreso á Liga ACB. / Obradoiro

Noticia

Abanca recibe ao Monbus Obradoiro tras o seu regreso á Liga ACB.

13 de maio de 2026

A entidade financeira recibe en Santiago a xogadores e corpo técnico do primeiro equipo e á directiva do club para felicitalos por lograr o pase directo á máxima categoría do baloncesto nacional.

O Centro ABANCA Obra Social de Santiago acolleu esta mañá a recepción institucional de ABANCA ao Monbus Obradoiro para celebrar o seu ascenso directo á liga ACB. Os xogadores e corpo técnico do primeiro equipo e parte da directiva do club compostelán foron recibidos polo director territorial de ABANCA en Santiago, Óscar Salgado, que estivo acompañado por varios directores de zona do banco.

Durante o acto, Óscar Salgado fixo entrega ao director xeral do Obradoiro CAB, Héctor Galán, dunha placa conmemorativa do ascenso co nome da entidade financeira, que forma parte do núcleo de patrocinadores principais e a longo prazo do Monbus Obradoiro.

A continuación, o representante de ABANCA trasladou a felicitación do banco ao persoal do primeiro equipo e á directiva do club polo seu regreso á máxima categoría do baloncesto español, un fito alcanzado o pasado venres tras gañar o campionato da Primeira FEB e levantar o título de Copa. Na súa intervención, Óscar Salgado reafirmou o compromiso de ABANCA co Obradoiro: “Ver a nosa imaxe unida a un equipo que nunca se rende e a unha afección tan exemplar é o que dá verdadeiro sentido á nosa histórica alianza co club”, subliñou, á vez que desexou ao equipo o maior dos éxitos no seu regreso á liga Endesa a próxima tempada.

Categorías

Crónica (36)

Plantilla

Equipo