Rolda de prensa escolar no CPI de Ponte Carreira / Obradoiro

Noticia

Rolda de prensa escolar no CPI de Ponte Carreira

21 de marzo de 2026

O Monbus Obradoiro protagonizou o pasado venres unha orixinal “rolda de prensa escolar” no Colexio Público de Ponte Carreira, onde os estudantes converteronse en xornalistas por un día nun encontro próximo e participativo que achegou o baloncesto profesional aos máis pequenos.

A visita ao Colexio Público de Ponte Carreira tivo lugar con motivo da rolda de prensa oficial da xornada 26 da Primeira FEB, na que o noso adestrador Diego Epifanio atendeu aos medios de comunicación. Tras finalizar este encontro profesional, deu paso a unha actividade moi especial: a rolda de prensa escolar, na que os alumnos e alumnas asumiron o papel de xornalistas e puideron entrevistar ao propio Diego Epifanio acompañado por Sergi Quintela e Felipe Dos Anjos.

Lonxe dun formato convencional, o salón de actos do centro transformouse nunha auténtica sala de prensa. Os estudantes fixeron preguntas sobre a vida dentro do vestiario, as rutinas de adestramento ou as experiencias persoais dos xogadores, mesturando curiosidade, humor e reflexión. Tamén se abordaron temas de esforzo e constancia, con consellos sobre a importancia de compaxinar estudos e deporte.

A xornada contou ademais coa presenza da nosa mascota, Chicha, que se gañou a atención do alumnado e animou a interacción no patio de recreo tras a rolda de prensa.

Máis aló da actividade puntual, este tipo de propostas reforzan o vínculo que o club mantén co centro desde hai anos. A implantación do baloncesto no día a día do colexio é xa unha realidade visible, tanto nas súas instalacións como na implicación do alumnado.

Para o Monbus Obradoiro, esta rolda de prensa escolar non foi só un exercicio educativo, senón unha oportunidade de compartir valores, achegar o baloncesto profesional aos máis novos e seguir construíndo comunidade desde a proximidade.

Categorías

Crónica (27)

Destacado

Plantilla

Equipo