O negro: historia, artesanía e tradición

A camiseta nace cun propósito: render homenaxe a Santiago de Compostela e á súa identidade máis profunda. Por iso, a cor protagonista é o negro azabache, un ton que non é casual, senón un símbolo cargado de tradición.

O azabache é unha pedra preciosa vinculada historicamente a Galicia e ao Camiño de Santiago. Desde a Idade Media, os artesáns composteláns foron recoñecidos en toda Europa pola súa mestría traballando este material, especialmente na creación de amuletos e conchas de peregrino, considerados protectores para quen emprendía a ruta xacobea. A súa presenza na cidade e nos postos tradicionais ao redor da Catedral convértese nun emblema cultural tan potente como único.

Por iso, vestir o azabache é vestir Santiago, Galicia e o Camiño.

Prateado: a luz que guía e o brillo da tradición

A segunda cor do deseño é o prateado, escollida para representar a luz que historicamente guiaba aos peregrinos cara á cidade santa. O prateado evoca tamén o brillo característico da ourivaría galega, especialmente visible en custodias, cruces, conchas e pezas artesás que forman parte do patrimonio cultural xacobeo.

Ademais, o prateado conéctanos directamente cun dos símbolos máis recoñecibles da Catedral: o Botafumeiro, cuxa estrutura está tradicionalmente bañada en prata e cuxo brillo impoñente guiou e fascinou aos peregrinos durante séculos. É unha cor que simboliza claridade, dirección e reflexión, unha metáfora perfecta do que significa o Camiño e da propia enerxía do baloncesto: avanzar, iluminar e superar retos.

Un deseño que fala de Santiago

No frontal, a camiseta incorpora unha representación mediante liñas da fachada central da Catedral de Santiago, unha versión moderna e estilizada dunha das catedrais máis icónicas do mundo.

Na parte traseira, no espazo onde habitualmente figura a bandeira de Galicia, aparece desta vez a Cruz de Santiago, reforzando o vínculo entre o club, a cidade e a súa historia.

Prezo e opcións de personalización

A camiseta sen mangas porase en precompra online ao prezo de 55 euros, mentres que a versión con manga curta sairá a 45 euros. Os abonados seguirán desfrutando do seu 10% de desconto.

Quen a adquira durante a precompra poderá engadir serigrafía personalizada de xeito totalmente gratuíto mediante técnica de sublimación.

Tras a precompra, cando chegue a remesa de camisetas, tamén se poderán adquirir na tenda física do Obradoiro e na web oficial. A precompra está aberta desde este mesmo momento ata o mércores 3 de decembro de 2025 ás 23:59.

A data estimada de entrega en tenda ou de envío das camisetas de precompra será o luns 22 de decembro.

Con esta edición especial, o Monbus Obradoiro invita á súa afección a lucir un deseño único que combina baloncesto, tradición e orgullo por Santiago de Compostela.