A iniciativa solidaria, impulsada conxuntamente por ambas entidades, desenvolveuse durante o encontro que enfrontou ao conxunto galego co HLA Alicante. O compromiso adquirido establecía que, por cada punto anotado no partido, Gadis doaría cinco quilos de comida destinados ao Albergue Juan XXIII.

O marcador final, 87-75, sumou un total de 162 puntos, que multiplicados por cinco deron como resultado os 810 quilos de alimentos finalmente doados.

No acto de entrega, o director do centro, Miguel de la Mata, destacou que “é moi importante o esforzo que realizan cada ano para proporcionarnos alimentos, xa que estamos inmersos nun partido moi longo: o partido contra a pobreza e as necesidades de tantas persoas. En nome de todos os nosos usuarios, agradecemos o voso compromiso e animámosvos a seguir impulsando este tipo de iniciativas”. Durante o ano 2025, o Albergue Juan XXIII ofreceu ceas a un total de 13.480 usuarios.

Pola súa banda, Héctor Galán, director xeral do Monbus Obradoiro, afirmou que para o club “é un pracer” participar neste tipo de accións. “Agradecemos tamén a Gadis a súa colaboración nesta 13ª edición do Partido Solidario, especialmente tendo en conta a gran cantidade de puntos anotados no encontro. Oxalá puidésemos estar aquí por outros motivos e que esta axuda non fose necesaria, pero mentres o sexa, o Monbus Obradoiro estará sempre disposto a colaborar”, sinalou.

En representación de Gadis estivo presente Miguel Freire, director de Relacións co Exterior do Grupo Gadisa, quen subliñou que “esta iniciativa de responsabilidade social corporativa tivo un resultado francamente positivo, xa que se superaron os 800 quilos de produtos non perecedoiros. Gadis debe estar presente neste tipo de accións, colaborando con familias necesitadas para as que esta axuda resulta fundamental”.

Con accións como esta, Gadis e o Monbus Obradoiro continúan demostrando que o deporte e a responsabilidade social poden ir da man, xerando un impacto positivo na comunidade.