Alejandro Galán, MVP Estrella Galicia de xaneiro / Obradoiro

Noticia

Alejandro Galán, MVP Estrella Galicia de xaneiro

9 de febreiro de 2026

O ala-pívot conseguiu o premio MVP Estrella Galicia, que o acredita como o mellor xogador dos partidos disputados polo Monbus Obradoiro durante o primeiro mes de 2026.

Os enfrontamentos ante Súper Agropal Palencia en Liga e Copa, Cloud.gal Ourense Baloncesto, HLA Alicante e Alimerka Oviedo deixaron tres candidatos propostos pola prensa local para facerse co galardón.

Finalmente, foron os afeccionados, a través das redes sociais, os que elixiron a Alejandro Galán como o mellor xogador do mes, cun 44,9 % dos votos. En segundo lugar situouse Felipe dos Anjos, cun 35 %, e en terceira posición quedou Dejan Kravic, cun 20,1 %.

Durante o acto de entrega, o propio xogador extremeño comentaba: “Non me agardaba isto. Estou contento polo último mes e por como competimos. Ao final, sempre intento dar o máximo e facer o mesmo que levo facendo sempre. Aínda que pode ser casualidade que nestes partidos me tocara a min anotar máis puntos; igual nos seguintes lle tocará a outro”.

“Temos tido lesións moi importantes, non só porque sexan de longa duración, senón porque eran xogadores que, en principio, ían ser clave para nós. Creo que nos recuperamos ben; os xogadores que chegaron adaptáronse moi rápido. É certo que en Ourense deixamos escapar unha vitoria importante, pero creo que nos recompuxemos ben. Nós temos que seguir co noso e sumar o máximo de vitorias posibles. Isto é moi longo”.

Respecto ao próximo rival do Monbus Obradoiro, Hestia Menorca, opinou que “é un moi bo equipo que, de feito, xa nos gañou. Agora incorporaron xogadores moi bos, ademais dos que xa tiñan. Será un equipo perigoso e un partido duro, que esperamos sacar adiante”.