MVP Estrella Galicia de febreiro para Sergi Quintela / Obradoiro

Noticia

MVP Estrella Galicia de febreiro para Sergi Quintela

4 de marzo de 2026

O escolta galego fíxose co premio MVP Estrella Galicia, que o acredita como o mellor xogador dos partidos disputados polo Monbus Obradoiro durante o mes de febreiro.

Os enfrontamentos ante Caja Rural CB Zamora, Hestia Menorca e Melilla Ciudad del Deporte deixaron tres candidatos propostos pola prensa local para facerse co galardón.

Finalmente, foron os afeccionados, a través das redes sociais, quen elixiron a Sergi Quintela como o mellor xogador do mes, cun 43,9 % dos votos. En segundo lugar situouse Micah Speight, cun 40,4 %, e na terceira posición quedou Alex Barcello, cun 15,7 %.

Durante o acto de entrega, o galego afirmou estar contento por recibir o trofeo e sinalou que, se ademais chega nun momento no que o equipo está a gañar, sabe aínda mellor. “Sempre que alguén che ratifica ese traballo, ese bo facer, é ben recibido, pero sobre todo cando hai bos resultados”.

Facendo un repaso do que vai de tempada, mencionou que “ao final os partidos clave conseguimos sacalos, pero tropezamos noutros por pensar máis alá. Entón imos cos pés na terra, partido a partido”.

O próximo rival do Monbus Obradoiro, tras a xornada de descanso e a xanela FIBA, será Flexicar Fuenlabrada. “Nestes días puidemos traballar cousas que igual non traballamos tanto no día a día por ter que preparar os partidos, pero a intensidade e o ritmo foron moi altos. Isto serviranos para ter recursos que nos poidan axudar nalgún momento de necesidade, cando un partido se poña un pouco máis costa arriba e precises probar cousas que non traballaches antes. Pero o máis importante é que non nos relaxamos nin baixamos o nivel competitivo, para que logo no primeiro partido non nos custe tanto”.

“Sabemos que vai ser un partido moi difícil. É unha pista moi complicada, teñen bos xogadores e un bo adestrador, por iso é importante estar centrados no sábado”.