Seguindo a liña de cores tradicionais do equipo, o Monbus Obradoiro terá como cor principal o branco, que o acompaña durante as últimas tempadas, aínda que sempre hai detalles que a diferencian ano tras ano.

Para esta tempada, a parte frontal incorpora a palabra ‘Obradoiro’ en forma arqueada e de cor vermella, que lle dá un toque moderno ao tempo que continúa coa tradición das camisolas antigas do club, como sucedía coa edición especial do curso pasado que facía alusión á tempada 82-83.

Ademais, a curvatura está inspirada nos arcos e ventás da fachada da Catedral vistos desde a Praza do Obradoiro. Dita fachada tamén inspira as seis franxas vermellas da parte frontal e traseira da camisola, abstraendo as formas das dúas torres e do corpo central da Catedral.

Tanto o número como o nome quedarán en cor azul mariño.

A segunda equipación será de cor azul mariño, con detalles en vermello e co nome e número en cor branca.

Ambas equipacións teñen o colo en forma de pico, con raias branca, azul e vermella, cores que sempre representaron ao equipo compostelán.

Geff seguirá sendo provedor oficial da roupa do Monbus Obradoiro esta tempada. A empresa que xa proporcionaba a roupa ao conxunto compostelán renova así o seu compromiso coa entidade.

Na parte frontal de ambas equipacións estará presente o logotipo de Estrella Galicia, un dos patrocinadores principais. Sobre o logotipo da Federación Española manterase a presenza de Cortizo, mentres que Abanca continuará aparecendo na parte traseira, debaixo do dorsal. Debaixo do nome de cada xogador seguirá Indupanel e, como novidade, incorporarase Vayper.

Próximamente, polos nosos canles oficiais, anunciarase como e onde adquirir as camisolas que vestirán os nosos xogadores durante a tempada 25/26.

Desde o Obradoiro CAB queremos agradecer á Fundación Down Compostela a súa dispoñibilidade para realizar a campaña de presentación da primeira e segunda equipación. Dar visibilidade ao seu colectivo é para nós un orgullo.