O Obradoiro U22 afrontaba o seu segundo partido consecutivo como local co obxectivo de dar continuidade á súa boa xeira. O conxunto dirixido por Martín Guerreiro volveu demostrar a súa capacidade para competir e xestionar os momentos de dificultade, nun encontro ante o Joventut de Badalona que esixiu manter a concentración ata o final.

O equipo visitante comezou con maior acerto e tomou a iniciativa nos primeiros compases (3-7). Porén, o Obra reaccionou cunha boa defensa colectiva e co acerto de Álvaro Soneira, que contribuíron a impulsar un parcial de 8-0 para darlle a volta ao marcador (11-7). O Joventut respondeu e recuperou a vantaxe, aínda que os composteláns conseguiron pechar o primeiro cuarto en igualdade (15-15).

O segundo período comezou con dificultades para anotar por parte de ambos os equipos, ata que Pablo Rodríguez abriu o marcador cun triplo. A canastra deu pulo ao Obradoiro, que encadeou un parcial de 10-0 para establecer unha primeira diferenza importante (25-15). Os cataláns trataron de recurtar distancias, pero o conxunto local volveu atopar solucións ofensivas para ampliar a súa vantaxe ata os once puntos (34-23). Ao descanso, o marcador reflectía un favorable 36-26 para os composteláns.

Tras a reanudación, o Obradoiro mantivo o control durante os primeiros minutos, pero o Joventut foi medrando co paso do cuarto. As dificultades ofensivas dos locais permitiron ao conxunto visitante aproveitar as súas oportunidades e reducir a diferenza ata situarse a só catro puntos (50-46). O equipo de Martín Guerreiro soubo reaccionar nun momento importante do encontro e recuperou parte da vantaxe, para pechar o terceiro período cun 58-48.

O último cuarto estivo marcado pola resistencia do Obradoiro ante os intentos de remontada do Joventut. Os composteláns chegaron a recuperar unha vantaxe de doce puntos (70-58), pero o conxunto catalán non deu o partido por perdido e apertou nos minutos finais, estreitando progresivamente o marcador ata situarse por diante. Lonxe de renderse, o Obra mantivo a competitividade nun desenlace de máxima esixencia e atopou a maneira de decantar o encontro ao seu favor.

Finalmente, o Obradoiro U22 impúxose por 75-71 e sumou unha nova vitoria ante a súa afección, prolongando a súa boa dinámica na competición.

Ficha técnica

75 – Obradoiro U22: M. Cambón (0), P. Rodríguez (13), A. Soneira (11), E. Zoroa (0), P. Baddini (5), L. Riga (18), M. González (10), H. Sánchez (0), M. Badji (13), H. Mateo (4), I. Butenko (1), Y. Rey (0).

71 – Joventut Badalona U22: I. Pérez (0), G. Barbosa (2), P. Batlle (5), M. Buben (0), P. Majoral (5), H. Ruiz (7), S. Lapuste (2), P. Saló (4), E. Coll (22), F. Mauri (6), D. Osayi (18).

Parciais: 15-15, 36-26 // 58-48, 75-71.

Árbitros: Jorge Baena Criado, Jaime Enrique Álvarez-Ossorio Varela e Jesús Ángel Novillo Romo.

Incidencias: Partido correspondente á terceira xornada da Liga U22, disputado no Multiusos Fontes do Sar de Santiago de Compostela.