O encontro comezou cun ritmo anotador baixo, con Efe Abogidi e Joel Soriano como primeiros protagonistas (0-3). O acerto exterior de Steward permitiu aos locais tomar a iniciativa, pero os triplos de Abogidi e Alex Barcello devolveron a vantaxe aos composteláns. Nun final igualado, un triplo de Yunio Barrueta deixou o marcador en 23-25.

Sergi Quintela abriu o segundo cuarto cun triplo e unha bandexa para ampliar a vantaxe visitante (23-30). O bo acerto desde o perímetro permitiu ao Monbus Obradoiro acadar unha vantaxe de once puntos tras un tiro libre de Caleb Agada (35-46). Porén, o San Pablo Burgos reaccionou antes do descanso e reduciu a diferenza ata o 38-46.

Tras a reanudación, os locais aumentaron a intensidade e conseguiron achegarse no marcador, situándose a só tres puntos (52-55). O conxunto galego respondeu no treito final do período e unha canastra de Yunio Barrueta sobre a bucina permitiu recuperar unha vantaxe de doce puntos (54-66).

No último cuarto, o Monbus Obradoiro chegou a ampliar a súa vantaxe ata os catorce puntos, pero o San Pablo Burgos volveu apertar e reduciu a diferenza ata os dous (66-68). Nos instantes decisivos, os composteláns volveron atopar o camiño cara ao aro e recuperaron unha vantaxe de sete puntos a falta de 1 minuto e 17 segundos (68-75). O equipo galego soubo xestionar os últimos ataques para pechar o encontro cunha vitoria por 72-79.

Ficha técnica

72 – San Pablo Burgos: C. Audige (9), DJ Steward* (21), Z. Samar (4), B. Koprivica* (11), P. Almazán (3), D. Díez (2), R. Guerrero (4), D. Radosavljevic* (0), C. Sengfelder* (4), S. Doumbouya (14), R. Lobaco* (0), J. Taboada (0).

79 – Monbus Obradoiro: B. Childress* (10), E. Abogidi* (10), C. Agada (5), F. Dos Anjos (4), L. Meindl* (7), J. Soriano* (7), Y. Barrueta (13), D. Brito (3), S. Quintela (7), A. Barcello* (13), A. Faure (0), A. Galán (0).

Parciais: 23-25, 15-21 // 16-20, 18-13.

Árbitros: Óscar Perea, Arnau Padrós e Ariadna Chueca.

Incidencias: Partido correspondente á cuarta xornada da Liga Endesa, disputado no Coliseum de Burgos.