Coñece o corpo técnico do Monbus Obradoiro / Obradoiro

Noticia

Coñece o corpo técnico do Monbus Obradoiro

O equipo galego xa ten o que será o seu corpo técnico de cara á próxima tempada. Epi queda aos mandos, axudado por Fran Hernández e Alberto Codeso.

O equipo compostelán xa ten a todo o persoal que formará parte do corpo técnico de cara á próxima tempada. A chegada de Epi trouxo consigo a renovación de Fran Hernández e a incorporación de Alberto Codeso como adestradores axudantes.

Á xa coñecida experiencia de Fran únese a sabedoría de Alberto, quen estivo os tres últimos anos como adestrador axudante no junior-EBA do Real Madrid. Antes xa coincidira con Epi no San Pablo Burgos e traballara na canteira do Valencia Basket e como axudante no Bilbao Basket, Baskonia, Real Madrid e Fuenlabrada.

O corpo técnico complétase con profesionais que coñecen moi ben a casa e que contan cunha sólida capacitación nas súas respectivas áreas. Rubén Vieira continuará como preparador físico. Álex Fernández seguirá como fisioterapeuta, acompañado este ano por Adrián Ameneiro. Jesús Marque repetirá como doutor do equipo e Nico Vázquez como asistente do corpo técnico. Pola súa banda, Jordi Izquierdo incorpórase como delegado do equipo.