Esta renovación ten como obxectivo ofrecer unha plataforma máis clara, intuitiva e accesible para todos os seguidores do club, facilitando o acceso á información e mellorando a experiencia de navegación.

Tras anos de frutífera colaboración con Cluplik, o club aposta agora por unha modernización integral da súa presenza en liña mediante a nova plataforma desenvolvida por T2V. Este cambio permitirá centralizar nun único sistema todas as ferramentas dixitais do club, integrando contidos de actualidade, a área de abonados, a venda de entradas e o merchandising oficial.

Entre as principais novidades, a web incorpora un espazo de novas e galerías fotográficas, unha sección dedicada á historia do club, canles de contacto e un apartado específico para o proxecto Obra-Social, que recollerá as iniciativas sociais levadas a cabo durante a pasada tempada. Ademais, destacarase o labor do Club de Empresas e a presenza dos principais patrocinadores do Obradoiro CAB.

No plano deportivo, os afeccionados atoparán toda a información sobre o primeiro equipo, o Monbus Obradoiro, así como un espazo para a canteira, que incluirá detalles sobre os campus e os equipos da Fundación Obradoiro. Tamén se estrea unha sección especial, ‘Obra-Kids’, pensada para que os máis pequenos gocen con xogos e contidos relacionados co baloncesto e co espírito obradoirista.

Un dos elementos distintivos desta nova web é a adopción do dominio .gal, unha extensión de nivel superior xeográfico (geoTLD) aprobada pola ICANN, concibida para representar e poñer en valor a cultura, lingua e comunidade galega.

Ao tratarse dunha web completamente nova, cómpre mencionar que se irán facendo probas durante as vindeiras semanas, de cara a que cando comece a pretempada e, máis concretamente, a tempada, xa estea a pleno rendemento para o goce de toda a afección. Durante este proceso de implantación terase en conta en todo momento aos obradoiristas, aos que se lles agradecerá que acheguen ideas para a mellora da web.

O Obradoiro CAB convida a toda a súa afección e aos medios de comunicación a visitar desde hoxe mesmo a nova web e comezar a familiarizarse co seu funcionamento.