O partido comezou cun ritmo anotador baixo. Os primeiros puntos do encontro chegaron desde a liña de tiros libres, obra de Leo Westermann, nos dous minutos iniciais. Pouco a pouco o Obradoiro foi atopando fluidez ofensiva e, con Yunio Barrueta e Alex Barcello sumando en ataque, abriu a primeira fenda no marcador (11-4). A partir de aí, os locais encadearon varias boas defensas e posesións efectivas que dispararon a vantaxe ata o +13 mediado o cuarto, o que deu tranquilidade á bancada. Unha canastra de Denzel Andersson pechou o primeiro período cun claro 26-7 que reflectía a superioridade dos galegos.

O segundo cuarto mantivo a mesma dinámica. Dejan Kravic e o propio Andersson inauguraron o marcador do período para ampliar aínda máis as diferenzas (33-7). O conxunto visitante apenas puido sumar tres puntos nos primeiros cinco minutos do cuarto, circunstancia que aproveitou o Obradoiro para elevar a vantaxe ata o +29 (39-10). Antes do descanso, Alex Barcello levou aos seus ata a barreira dos cincuenta puntos, establecendo ademais a maior renda ata ese momento (51-20).

Tras o paso polos vestiarios, o guión do partido apenas cambiou. Nos primeiros minutos do terceiro cuarto ambos os equipos tanteáronse, aínda que o Obradoiro mantivo sen problemas a súa ampla vantaxe (56-25). Co paso dos minutos, os locais seguiron ampliando distancias ante un Cartagena desbordado (63-28). A falta de dous minutos, Andersson situaba a diferenza en 40 puntos (72-32), deixando practicamente sentenciado o choque. Un triplo de Travis Munnings sobre a bucina do terceiro período elevou a máxima ata o +44 (79-35).

Lonxe de relaxarse, o Obradoiro mantivo a intensidade no último cuarto e chegou a acadar os 50 puntos de vantaxe (88-38). Co partido xa decidido, os de Epi centraron os seus esforzos en alcanzar a barreira dos cen puntos, mentres que o conxunto visitante trataba de maquillar o resultado. Finalmente, cos doce xogadores locais sumando no apartado anotador, o encontro concluíu cun rotundo 101-49 que selou unha plácida e coral vitoria para o conxunto picheleiro na súa volta a Sar.

Ficha técnica

101 - Monbus Obradoiro: Denzel Andersson (12), Felipe dos Anjos (6), Leo Westermann (5), Alonso Grela (2), Dejan Kravic (10), Aitor Etxeguren (4), Travis Munnings (14), Yunio Barrueta (15), Diogo Brito (6), Sergi Quintela (4), Alex Barcello (11), Alejandro Galán (12).

49 – Grupo Caesa Seguros FC Cartagena CB: Javi López (2), Chayce Polynice (3), Sediq Garuba (0), Isaiah Rivera (9), Alberto Martín (6), Kobe Webster (3), Robinson Idehen (3), Adriá Domenech (14), Vitor Faverani (6), Miguel Ayesa (3), Alex Harguindey (0), Spencer Svejcar (0).

Cuartos: 26-7, 51-20, 79-35, 101-49.

Árbitros: Ángel Antonio Albacete Chamón, José Carlos Sierra Carillo, Sergio del Val Nuño.

Incidencias: Partido correspondente á vixésimo cuarta xornada de Primeira FEB disputado no Multiusos Fontes do Sar de Santiago de Compostela ante 3.835 espectadores.