O encontro comezou de forma moi positiva para o equipo de Diego Epifanio, que asinou un parcial inicial de 0-6 grazas ás primeiras canastas de Leo Westermann, Felipe Dos Anjos e Alex Barcello. HLA Alicante reaccionou rapidamente e, antes do ecuador do primeiro cuarto, conseguía colocarse por diante no marcador (12-11). Unha boa racha dos exteriores locais mantivo o partido moi igualado. A dous minutos para o final do período, o marcador reflectía táboas (22-22) e, na última posesión visitante, Dejan Kravic penetró na pintura para deixar ao Obradoiro por diante ao remate do primeiro cuarto (26-27).

O segundo cuarto arrancou con ímpeto local. HLA Alicante logrou abrir unha pequena fenda de catro puntos aos dous minutos (31-27), pero a reacción obradoirista non tardou en chegar. Travis Munnings e Sergi Quintela devolvían a vantaxe aos composteláns (31-32). No ecuador do período, e co equipo tres puntos por debaixo tras dous tiros libres locais, Epi solicitou tempo morto para reaxustar ao equipo (36-33). O conxunto alacantino mantivo a iniciativa durante varios minutos, ata que, a falta dun minuto e medio, Alejandro Galán asinou o empate a 45. O partido marchábase ao descanso con máxima igualdade (47-47).

Tras o paso polos vestiarios, ambos equipos intercambiaron canastas durante os primeiros compases do terceiro cuarto. Pasados tres minutos e medio, HLA Alicante recuperou unha vantaxe de cinco puntos e incluso logrou ampliala (59-53). O Monbus Obradoiro reaccionou aproveitando varios erros rivais e volveu apretar o marcador ata situarse a só un punto (62-61). A dous minutos do final do cuarto, Sergi Quintela culminou a remontada e puxo por diante aos visitantes (64-65). Un bo tramo defensivo permitiu ao conxunto compostelán pechar o período cun parcial favorable e abrir unha pequena vantaxe (64-69).

O último cuarto arrancou cunha canasta de Dejan Kravic, seguida dun roubo e dunha nova anotación de Sergi Quintela que elevaban a renda visitante ata o +9 (64-73), a maior ata ese momento. HLA Alicante tratou de reaccionar e conseguiu achegarse a cinco puntos, pero o Monbus Obradoiro respondeu con contundencia. Dous triplos consecutivos de Denzel Andersson, sumados a unha bandeira de Dejan Kravic, ampliaban a vantaxe ata o +15 (68-83). A partir de aí, o conxunto galego soubo xestionar o tramo final do encontro. Tres tiros libres de Alex Barcello, a falta de dous minutos, colocaban o +17 no marcador (76-93) e remataban de encamiñar a vitoria. Finalmente, o Monbus Obradoiro pechou o partido superando a barreira dos cen puntos para selar unha contundente vitoria en Alicante (80-103).

Ficha Técnica

80 – HLA Alicante: J. Bone (18), Y. Joseph (5), U. Mendicote Rubio (0), S. Hollanders (3), J. Mwema (2), E. Polanco Tavares (2), B. Coulibaly (2), K. Larsen (19), I. Tamba Villen (3), A. Jorda Rodríguez (6), D. Geu (9), M. Torres Cuevas (11).

103 - Monbus Obradoiro: Denzel Andersson (8), Felipe dos Anjos (12), Leo Westermann (9), Alonso Grela (0), Dejan Kravic (14), Aitor Etxeguren (0), Travis Munnings (9), Yunio Barrueta (8), Diogo Brito (3), Sergi Quintela (12), Alex Barcello (16), Alejandro Galán (12).

Cuartos: 26-27, 47-47, 64-69, 80-103.

Árbitros: Leandro Nicolás Lezcano, Josep María Olivares Bernabeu, Laura Piñeiro Amondaray.

Incidencias: Partido correspondente á vixésima quinta xornada da Primeira FEB disputada no Centro de Tecnificación Deportiva de Alicante.