Portas abertas no Sar para o Monbus Obradoiro

Noticia

Portas abertas no Sar para o Monbus Obradoiro - Porto

O luns 1 de setembro o conxunto dirixido por Epi mídese aos portugueses no que será o seu primeiro partido amigable en Santiago de Compostela.

Coa pretempada xa en marcha, chega un dos momentos preferidos pola afección de calquera equipo deportivo: poder ver aos xogadores que loitarán polo escudo na próxima campaña. Aínda que non será o primeiro partido de pretempada, si será o primeiro que se dispute no Multiusos Fontes do Sar.

Para que o equipo poida sentir de preto o apoio da súa afección, o club decidiu abrir as portas do Sar, de xeito que calquera seareiro que o desexe poida achegarse e ter a oportunidade de presenciar o encontro.

Co fin de facilitar a asistencia, o partido será de balde para toda a afección. O choque dará comezo ás 19:00 horas, e as portas abriranse 60 minutos antes.

O enfrontamento entre Monbus Obradoiro e Porto servirá como antesala da Copa Galicia, que se disputará o venres 5 e o sábado 6 de setembro. Ademais, este podería non ser o único partido no Sar antes do inicio da liga, xa que está pendente de confirmación un partido de presentación a fin de semana do 19 de setembro, que sería a previa da primeira xornada fronte ao Hestia Menorca, en terras baleares.

Desde o Monbus Obradoiro convidamos a toda a afección a asistir ao encontro para que poidamos gozar xuntos dun primeiro gran día de baloncesto na tempada 2025/26.