Martes universitario na Caldeira / Obradoiro

Noticia

Martes universitario na Caldeira

4 de febreiro de 2026

O baloncesto profesional chega á universidade: o próximo martes 10 de febreiro ás 20:30 horas, os estudantes da USC poderán gozar do partido do Monbus Obradoiro contra Hestia Menorca con entradas a prezos especiais pensadas só para a comunidade universitaria.

Para achegar o baloncesto profesional á comunidade universitaria e fomentar o deporte entre os mozos, Monbus Obradoiro, xunto coa Universidade de Santiago de Compostela, presentan unha promoción de entradas a prezos especiais para o encontro da xornada 20 da Primeira FEB, no que os galegos se enfrontarán a Hestia Menorca.

Como adquirir as entradas

Cada persoa poderá adquirir un máximo de dúas entradas. A promoción inclúe tres modalidades, limitadas e suxeitas á orde de adquisición:

Primeiras 100 entradas: gratuítas para os máis rápidos.
Entradas 101 a 200: 3 euros cada unha.
Entradas 201 a 300: 5 euros cada unha, sempre condicionado á capacidade dispoñible.

Todas as localidades estarán situadas na Tribuna 2 do Multiusos Fontes do Sar. Para beneficiarse destas condicións, será necesario presentar a Tarxeta Universitaria de Identidade (TUI) no acceso ao pavillón.

Código promocional

Para que se aplique o desconto, é obrigatorio que o comprador seleccionase un asento en Tribuna 2 e utilice o seguinte código promocional ao adquirir as entradas:

USC12256

Unha experiencia única

Grazas a esta iniciativa, os estudantes teñen a oportunidade de vivir o baloncesto profesional desde unha perspectiva próxima e accesible. Goza do partido nun ambiente cheo de enerxía e acompaña ao Monbus Obradoiro nun encontro que promete emoción e espectáculo sobre a pista.