Coa pretempada chegando á súa recta final, o Monbus Obradoiro organiza o I Torneo Internacional Concello de Santiago de Compostela, que se disputará o venres 19 de setembro ás 19:30 horas no Multiusos Fontes do Sar. Nesta primeira edición, o conxunto compostelán medirase ao Oliveirense Basquetebol portugués, nun partido que servirá de antesala ao inminente inicio da liga.

As entradas terán un prezo de 1 euro para abonados e 5 para non abonados. A recadación irá destinada á Fundación Refuxio Animal e a Xea Galicia Recollida de Animais, co obxectivo de impulsar campañas de concienciación sobre benestar animal, loita contra o abandono e fomento da adopción responsable de animais de compañía.

Os abonados terán prioridade na compra de entradas, polo que a venda estará aberta para eles ata o mércores 17 de setembro ás 12:00 horas. A partir desa hora a venda abrirase para todo o público. Cada persoa que merque unha entrada deberá escoller o seu asento, non tendo os abonados reservado o asento que ocuparán durante a tempada.

Ao rematar o encontro, os afeccionados poderán reunirse co equipo no hall do Multiusos Fontes do Sar, onde se instalará unha barra solidaria para seguir apoiando as causas benéficas. Será unha ocasión especial para compartir un intre agradable cos xogadores e o corpo técnico, que se unirán tras pasar polos vestiarios.