O Monbus Obradoiro pon en marcha un novo e ilusionante proxecto coa creación do seu equipo U22, unha aposta estratéxica da entidade para fortalecer a canteira e dar continuidade ao talento novo. O conxunto obradoirista quedou encadrado no Grupo B da primeira fase da competición, onde se medirá a rivais de primeiro nivel como Bilbao Basket, Unicaja Alhaurín de la Torre, Amara Lleida, Kids&Us Manresa, Joventut Badalona e UCAM Murcia Juver.

A actividade para o filial compostelán comezará a semana do 17 de agosto cos correspondentes recoñecementos médicos e o inicio do traballo sobre a pista. Como mostra do compromiso da entidade coa formación, varios compoñentes deste cadro compaxinarán a súa preparación realizando a pretempada co primeiro equipo.

Corpo técnico

O banco estará liderado por Martín Guerreiro, quen afronta a súa sexta tempada na estrutura do club e suma xa tres campañas como adestrador en Terceira FEB. Estará acompañado por Jesús Montero como adestrador axudante, na que será a súa cuarta tempada no club e a terceira ao lado de Guerreiro. Como adestrador axudante e analista contará con Pablo Cereijo. A área de preparación física correrá a cargo da Clínica Momentum, baixo a supervisión de Adrián González e con Ángel Parada como preparador físico do equipo, mentres que Julio Santiago será o responsable da fisioterapia.

Cadro Monbus Obradoiro U22

• Álvaro Soneira (Base)
• Pedro Baddini (Base)
• Pablo Rodríguez (Base/Escolta)
• Hugo Sánchez (Alero)
• Hadrián Mateo (Alero)
• Miquel González de Ubieta (Escolta/alero)
• Mateo Cambón (Ala-pivote)
• Louis Riga (Ala-pivote)
• Illya Butenko (Ala pivot/pivot)
• Malang Badji (Pivot)

O resto do equipo estará formado por xogadores doutros equipos da canteira obradoirista.