O inicio foi de poucas ocasións, cos ovetenses cometendo dúas faltas en menos dun minuto. Isto permitiu aos composteláns adiantarse dende a liña de tiros libres. Co paso dos minutos o ritmo foi medrando, aínda que mediado o cuarto os visitantes só anotaran dende o 4,60 (8-4). Dúas boas canastras de Álex Barcello devolvían o empate, e nos instantes finais os puntos foron chegando con máis fluidez ata pechar o primeiro acto cun 19-14 para os locais.

No segundo cuarto, o Alimerka Oviedo golpeou con forza dende o inicio, abrindo unha renda de +9 (25-16). A diferenza mantívose varios minutos, pero algúns erros en ataque dos asturianos deron aire aos galegos, que recortaron lixeiramente. Porén, o conxunto local volveu estirarse ata acadar o +14 (40-26). Antes do descanso o Obradoiro logrou reducir diferenzas, aínda que os ovetenses marcharon por diante (44-34). Nese momento, Álex Barcello era o máximo anotador do encontro con 9 puntos.

O terceiro período comezou con canastra visitante, pero axiña reaccionou o Oviedo e púxose +16 (56-40). A dinámica do partido non mudou e os locais consolidaron o seu dominio, ampliando a renda ata +17 (61-44). Ao final do cuarto, o marcador sinalaba un cómodo 63-47.

O último cuarto arrincou cunha seca anotadora: tres minutos sen puntos para ningún dos dous equipos. Daquela apareceu Leo Westermann con dúas canastras seguidas e Pedro Baddini cun triplo, reducindo a desvantaxe a só sete puntos (63-56). O Obradoiro, agora si, mostrouse intenso e conseguiu apertar o marcador ata o 68-64 a falta dun minuto.

Porén, o esforzo final non foi dabondo. O Alimerka Oviedo soubo administrar a renda construída nos cuartos centrais e acabou deixando a vitoria na casa (74-70).