Natural de Ávila, pero picheleiro de adopción, Álvaro foi parte esencial dunha das etapas máis brillantes do Monbus Obradoiro. Durante cinco tempadas consecutivas defendeu con orgullo a camiseta na Liga Endesa e, na súa última etapa, colleu o timón como capitán, loitando ata o final por devolver ao equipo ao máis alto do baloncesto nacional. O soño, desta volta, non puido cumprirse. Pero a súa entrega, o seu liderado e o seu exemplo quedarán para sempre na nosa memoria.

Nesta última tempada asinou unha media de 6,5 puntos, 2,6 rebotes e 0,9 asistencias por partido. Cifras que lle valeron para ser elixido pola nosa afección como o Mellor Xogador Estrella Galicia nos meses de decembro e xaneiro, e tamén para alzarse co galardón de MVP da tempada, entregado o pasado mes de xuño.

Se hai unha data que gardaremos con especial agarimo, é a do 1 de decembro de 2024. Ese día, tras nove meses dunha longa recuperación dunha grave lesión de xeonllo, volveu gozar deste deporte que tanto nos apaixoa, pisando de novo a pista de Sar. Aquel aplauso foi a proba do cariño que lle ten Santiago de Compostela e, en especial, este equipo que foi o seu fogar durante tantos anos.

Grazas, Álvaro. Grazas polo teu compromiso, pola túa entrega incansable, por cada xesto dentro e fóra da pista. Grazas por liderar co corazón e, sobre todo, por deixar pegada.

Desexámosche toda a sorte do mundo nos teus próximos proxectos e esperamos seguir véndote gozar do baloncesto polas pistas.

No Fontes do Sar sempre terás a túa casa, capitán.